Хүүхэд насны хамгийн аз жаргалтай өдрүүдийн нэг бол төрсөн өдрийн баяр байдаг билээ. Энэ баярыг хайртай хүмүүстэйгээ тэмдэглэн өнгөрөөх нь чухал байдаг. Ээж, аавууд нь ажил ихтэй байдаг учир зарим үед хүүхдийн төрсөн өдөр гунигтай өнгөрөх нь бий.
Тэгвэл Говьсүмбэр аймгийн Улсын бүртгэлийн хэлтэс албан хаагчиддаа хүүхдийнх нь төрсөн өдрөөр цалинтай чөлөө олгож байхаар шийдвэрлэжээ. Уг байгууллагын албан хаагчийн 16 хүртэлх насны хүүхэд бүрийнх нь төрсөн өдрөөр тус хэлтэст ажилладаг эцэг эхэд нь цалинтай нэг өдрийн чөлөө олгох юм байна.
Тус хэлтсийн “Хүүхэд хамгааллын талаар хэрэгжүүлэх ажлын төлөвлөгөө”-нд тусгагдсаны дагуу эцэг эхчүүд хүүхдэдээ тавих анхаарал халамжийг нэмэгдүүлэх, эцэг эхийн үүргээ биелүүлэхэд нь дэмжлэг үзүүлэх, хүүхэдтэйгээ ойр байх боломжийг бүрдүүлэхээр олон ажил санаачлан хийж байгаагийн нэг нь энэхүү цалинтай чөлөө юм.
Чөлөө олгохдоо тухайн албан хаагчийн ажлыг орлож ажиллах албан хаагчийг томилж, ажил үйлчилгээ тасралтгүй хэвийн явагдах боломжийг бүрдүүлэн ажиллах чухал хэмээн онцолж байгаа аж.
